| |
Um mig
Ég
hóf starfsemi sem höfuðbeina- og spjaldhryggsjafnari á Akureyri í byrjun júlí
2003 eftir að hafa lokið námi í Cranio-skólanum. Til þess að geta boðið
skjólstæðingum mínum betri þjónustu og til þess að geta valið meðferð sem
hentar hverju sinni hóf ég nám í notkun Bowen tækni með því að sækja námskeið hjá Margeiri Sigurðarsyni.
-
Vorið 2005 hóf ég að kynna mér TFT-meðferð (Thought Field Therapy) og sótti námskeið í þeirri
aðferð í Chicago í september 2005 eftir að hafa farið í gegnum yfirgripsmikið sjálfsnám með aðstoð bóka, diska og
myndbanda sumarið 2005. Ég er
eini Íslendingurinn sem sótt hefur nám í TFT og fengið skírteini og leyfi frá
Callahan Techniques til að beita meðferðinni.
-
Ég hóf ég nám í hjúkrunarfræði við Háskólann á
Akureyri haustið 2003 til þess að öðlast enn betri innsýn í meðhöndlun líkamans og samskipti við skjólstæðinga mína
og stunda þar nám nú jafnframt störfum mínum við að hjálpa fólki með TFT, Bowen tækni eða höfuðbeina- og
spjaldhryggsjöfnun að vopni.
-
Ég hef lokið námi í Cranio-skólanum, sem er skilyrði fyrir
inngöngu í Cranio – félag höfuðbeina- og spjaldhryggsjafnara á Íslandi.
Námið er yfirgripsmikið og þeir nemendur sem ljúka námi eru færir um að
veita árangursríka meðferð við margs konar kvillum. Námið er í sex hlutum og
tekur samtals tvö ár þar sem skiptast á krefjandi námskeið og reglulegar æfingar og heimaverkefni. Nánari upplýsingar um námið er að finna hér á
vefnum. Jafnframt námi í höfuðbeina- og spjaldhryggsjöfnun tók ég að mér að
þýða námsefnið sem Thomas Attlee, stofnandi og skólastjóri College of
Cranio-Sacral Therapy (CCST) í London, hefur samið og notar við kennsluna.
Ég sótti fyrsta námskeiðið af sex í höfuðbeina- og spjaldhryggsjöfnun í maí
2001 og það sjötta og síðasta í júní 2003.
-
Nám í Bowen tækni skiptist í fimm hluta og hef ég lokið því námi með verklegu og
skriflegu prófi
undir handleiðslu Margeirs Sigurðarsonar og Julians Baker, skólastjóra European College of
Bowen Studies (ECBS) í London, en nánari upplýsingar um námið er að finna
á öðrum stað hér á þessum vef og á öðrum vefjum sem vísað er til. Í apríl 2005 tók ég
fyrsta námskeiðið af þremur þar sem ítarlega er fjallað um notkun Bowen tækninnar gegn íþróttameiðslum af ýmsu tagi.
Kennari á því námskeiði var Paula Esson frá Englandi.
Ég er fædd 1963,
bý og starfa á Akureyri, er í sambúð og á fjögur börn. Ég hef mikinn áhuga á
andlegum og dulrænum málefnum, sérstaklega í tengslum
við það að bæta líf og heilsu, bæði hjá sjálfri mér og öðrum.
Fara efst á síðu...
|
Verð og greiðslur
Einn
meðferðartími kostar 4.000 krónur. Þjónustan er því miður ekki niðurgreidd af Tryggingastofnun ríkisins en athygli
er vakin á að mörg stéttarfélög endurgreiða hluta kostnaðar - ef fyrir liggur tilvísun eða vottorð frá lækni um
þörfina fyrir meðferð af þessu tagi (sambærilegt við sjúkranudd og fleira slíkt). Leitaðu upplýsinga hjá
stéttarfélaginu þínu.
Tíðni og fjöldi tíma
Að jafnaði er miðað við að fólk fái
ekki meðferð oftar en einu sinni í viku á meðferðartímanum. Gera má ráð fyrir að þrír tímar með reglulegu millibili
nægi í flestum tilvikum en það er nokkuð einstaklingsbundið og fer einnig eftir því hvaða kvilla eða sjúkdóm við er
að eiga.
Líkaminn læknar sig sjálfur
Hippocrates
sagði að líkaminn læknaði sig sjálfur og sá sem veitir meðferð sé aðeins verkfæri náttúrunnar til þess.
Allt
sem ég geri með aðstoð Bowen tækni eða með höfuðbeina- og spjaldhryggsjöfnun miðar að því að hjálpa líkamanum til
þess að lækna sig sjálfur.
Ég hjálpa þér með því að meðhöndla
líkamann með þeirri aðferð sem hentar þér - með tilliti til líkamlegs og andlegs ástands þíns. Meðferðin sem ég
veiti er þægileg og afslappandi. Þú getur náð djúpri slökun um leið og líkami þinn fær þá hjálp sem hann þarfnast
til endurnæringar og þá aðstoð og hvatningu sem hann þarf til að lækna sig sjálfur.
TFT-meðferð, Bowen
tækni og höfuðbeina- og spjald-hryggsjöfnun eru aðferðir sem hafa reynst mjög árangursríkar.
Hverja þessara aðferða
ég nota hverju sinni fer eftir því við hvaða vandamál er að fást, ástandi og óskum skjólstæðings míns ásamt
mati mínu á aðstæðum og því hver þessara aðferða er líklegust til árangurs.
Fara efst á síðu... |
|
