Jóhanna Harðardóttir

Upplýsingar og tímapantanir í síma 824 2777
TFT-meðferð (Thought Field Therapy), Bowen tækni
og höfuðbeina- og spjaldhryggsjöfnun á Akureyri

Höfuðbeina- og spjaldhryggsjöfnun

Hér að neðan eru svör við algengum spurningum um höfuðbeina- og spjaldhryggsjöfnun. 

Hvað er höfuðbeina- og spjaldhryggsjöfnun?
Í hverju felst meðferðin?
Hverjum og við hvaða kvillum getur meðferðin gagnast?
Hvaðan kemur þessi meðferð og hver er saga hennar?
Hvernig er félagsskapur höfuðbeina- og spjaldhryggsjafnara á Íslandi?
Hvernig er háttað námi í höfuðbeina- og spjaldhryggsjöfnun?

Ef þig vantar frekari upplýsingar skaltu ekki hika við að hafa samband við mig í síma eða með tölvupósti.

Hvað er höfuðbeina- og spjaldhryggsjöfnun?

Höfuðbeina- og spjaldhryggskerfi líkamans samanstendur af beinum höfuðs, hryggs, spjaldhryggs og mjaðma, öllum himnum heila og mænu og þeim líffærum sem tengjast framleiðslu og frárennsli heila- og mænuvökvans. Þrýstingur innan þessa kerfis fellur taktfast 4-14 sinnum á mínútu. Þetta kerfi er sú líffræðilega umgjörð sem miðtaugakerfið þarf til þess að geta þroskast og haldið sér við.

Sú eða sá sem meðferðina veitir nemur taktinn í höfuðbeina- og spjaldhryggskerfi líkamans og hreyfingar höfuðbeina, finnur stíflur og hindranir og hjálpar líkamanum að losa stíflurnar, fjarlægja hindranir og rétta sig af án þess að þvinga hann á nokkurn hátt. Notuð er mild snerting handa við höfuð (cranium), spjaldhrygg (sacrum), eða hvaða hluta líkamans sem við á, til þess að greina vandann og meðhöndla. Líkamanum er eðlilegt að skapa og viðhalda heilbrigði og að útrýma sjúkdómum og sýkingum. Líkaminn getur samt ekki starfað eðlilega nema vefir hans og vökvar geti unnið óheftir. Með aðstoð sinni leitast höfuðbeina- og spjaldhryggsjafnarinn við að skapa þetta ástand í líkamanum til þess að gera honum kleift að starfa eðlilega og lækna sjálfan sig.

Höfuðbeina- og spjaldhryggsjöfnun er óvenjulega mild en jafnframt öflug meðferð sem hefur það meginmarkmið að skapa heilbrigt jafnvægi á öllum sviðum líkamsstarfseminnar og viðhalda því.

Meðferðin getur bæði fjarlægt sjúkdómseinkenni og þær truflanir sem valda þeim en getur einnig haft djúpa og áhrifamikla heilandi verkun á fjölmörg líkamleg vandamál, hvort heldur er einfaldan sársauka eða langvinnt og flókið heilbrigðisvandamál. Meðferðin getur gagnast fólki á öllum aldri og við nánast hvaða aðstæður sem er, meðal annars vegna þess hve mild hún er. Að auki er þetta mjög þægileg og slakandi meðferð. Meðferðin miðar alfarið að því að efla heilbrigði, styrkleika og lífsþrótt út frá innsta kjarna mannsins. Hún örvar eðlilegan lækningarmátt líkamans, kemst að rótum vandans, tekur á flóknum og erfiðum aðstæðum og samhæfir alla styrkleikaþætti líkamans til sjálfslækningar.

Meðferðinni fylgir gjarnan djúp hlýju- og slökunartilfinning um leið og einstaklingurinn er leiddur inn í friðsælt vellíðunar- og jafnvægisástand.

Fara efst á síðu...

Í hverju felst meðferðin?

Við greiningu og meðferð beitir höfuðbeina- og spjaldhryggsjafnari mjög léttri handsnertingu á höfuð, spjaldhrygg og ýmsa aðra staði líkamans eftir ástæðum.

Höfuðbeina- og spjaldhryggsjafnarinn beitir næmi sínu til þess að „hlusta“ á líkama skjólstæðingsins með höndunum. Hann getur greint tog, snúning og spennu í vefjunum, sem geta brenglað eða hindrað eðlilegar, taktfastar hreyfingar innan höfuðbeina- og spjaldhryggskerfisins. Þessar truflanir endurspegla heilbrigði einstaklingsins. Í gegnum þessa léttu snertingu er unnt að vinna með og losa um spennuna og snúninginn. Þannig er einnig hægt að greina upptök vandans og örva hin hárfínu lækningaviðbrögð sem tengjast höfuðbeina- og spjaldhryggskerfi líkamans – sem nefnt hefur verið þriðja taktkerfi líkamans.

Líkaminn hefur eðlilega þörf fyrir að auka heilbrigði sitt, viðhalda því og vinna gegn sjúkdómum og sýkingum en til þess að hann geti starfað á heilbrigðan og eðlilegan hátt er nauðsynlegt að allir vefir hans og vökvar geti hreyfst óhindrað og frjálst. Ef þessi frjálsa hreyfing er hindruð á einhvern hátt hefur það í för með sér þrengsli, stíflur eða stöðnun og í kjölfarið sjúkdóma og skerta líkamsstarfsemi.

Það markmið sem haft er í huga við meðferðina er að „hlusta“  á takt þriðja taktkerfisins, greina hindranir í líkamanum og losa um þær. Þannig endurvekur líkaminn sitt eigið orkuflæði og stuðlar að eðlilegri starfsemi í sérhverjum líkamshluta og einstaklingnum í heild.

Fara efst á síðu...

Hverjum og við hvaða kvillum getur meðferðin gagnast?

Meðferðin getur komið nánast hverjum sem er að gagni við nánast hvaða aðstæður sem er. Hún nýtist hverjum og einum í samræmi við þær þarfir sem líkaminn hefur til lagfæringar og betra jafnvægis því líkaminn stýrir meðferðinni sjálfur þegar hann fær ákveðna örvun til þess.

Reynslan sýnir að höfuðbeina- og spjaldhryggsjöfnun hefur góð áhrif á líkamann og örvar hann til sjálfsheilunar án tillits til þess hvaða sjúkdómur eða kvilli hrjáir hann. Árangurinn er misjafnlega góður eftir einstaklingum, sjúkdómum og vilja líkamans til þess að taka við meðferðinni.

Hér að neðan er listi með dæmum um sjúkdóma, kvilla eða ástand sem reynslan hefur sýnt að höfuðbeina- og spjaldhryggsjöfnun getur átt þátt í að lagfæra. Athygli er vakin á því að þessi listi er alls ekki tæmandi.

Fara efst á síðu...

Hvaðan kemur þessi meðferð og hver er saga hennar?

Rekja má upphaf höfuðbeina- og spjaldhryggsjöfnunar aftur til upphafs tuttugustu aldarinnar þegar dr. William Sutherland uppgötvaði að höfuðkúpubein mannsins voru hreyfanleg um saumana, sem var andstætt því sem þá var almennt talið. Sutherland prófaði uppgötvun sína á sjálfum sér, notaði hjálm sem hægt var að herða að höfðinu á mismunandi stöðum. Tilraunir hans kölluðu fram margvísleg einkenni þegar þrýstingi var beitt á hin ýmsu bein höfuðkúpunnar. Fram komu höfuðverkur, samhæfingarvandamál og persónuleikabreytingar, svo eitthvað sé nefnt.

Það var síðan fyrir tilviljun sem læknirinn og oesteopathinn dr. John Upledger uppgötvaði að ekki reyndist unnt að halda mænuslíðrinu í kyrrstöðu þegar hann aðstoðaði við uppskurð á hálsliðum sjúklings þar sem fjarlægja átti kalk af heila- og mænuhimnu (dura mater). Hann áttaði sig á því að þarna var ekki aðeins hreyfing heldur einnig taktbundinn sláttur að því er virtist. Hann uppgötvaði síðar sjálfstætt vökvaþrýstikerfi innan hryggsúlu og höfuðkúpu sem hefur áhrif á alla líkamsstarfsemina. Tvö ár liðu þó án þess að Dr. Upledger gæti nýtt sér þessa stórkostlegu uppgötvun. Hann fékk einmitt samhengi í hugmyndir sínar þegar hann sótti námskeið í aðferðum og sjúkdómsgreiningu hjá höfuðbeinasérfræðingnum dr. William Sutherland.

Árið 1972 sýndi dr. John Upledger fram á að nýta mætti þessa vitneskju til meðferðar á ýmsum erfiðum kvillum. Með rannsóknum sem hann gerði í samstarfi við aðra vísindamenn tókst að mæla nákvæmlega hinar örsmáu hreyfingar höfuðbeinanna, í hvaða áttir og hve hratt þau hreyfast. Út frá þessum uppgötvunum þróaði hann síðan höfuðbeina- og spjaldhryggsjöfnun (Cranio-Sacral Balancing Therapy) og rekur nú meðferðarstofnun í Flórida í Bandaríkjunum, Upledger Institude. Hann hefur náð frábærum árangri í störfum sínum, höfuðbeina- og spjaldhryggsjöfnun hefur breiðst út og er nú notuð víða um heim. Fyrstur Íslendinga til þess að kynnast höfuðbeina- og spjaldhryggsjöfnun og kynna hana hér var Gunnar Gunnarsson sálfræðingur, sem skipulagði fyrsta námskeiðið í þessari árangursríku meðferð hér á landi.

Fara efst á síðu..

Hvernig er félagsskapur höfuðbeina- og spjaldhryggsjafnara á Íslandi?

Félag höfuðbeina og spjaldhryggsjafnara var stofnað 1996, fyrst undir heitinu ATLAS en heitir nú Cranio - félag höfuðbeina- og spjaldhryggsjafnara á Íslandi. Skráðir félagsmenn eru vel á annað hundraðið samkvæmt félagatali á vef félagsins, www.cranio.cc. Upphaf félagsins og notkun höfuðbeina- og spjaldhryggsjöfnunar hér má rekja til þess að Gunnar Gunnarsson sálfræðingur kynntist þessari meðferð í Þýskalandi og skipulagði nám í greininni hér á landi. Nám í höfuðbeina- og spjaldhryggsjöfnun fór fyrst fram í Reykjavík 1994 og var þá í þremur hlutum þar sem hvert námskeið stóð í sjö daga. Fyrsti kennarinn var Svarupo Heike Pfaff. Námskeiðin tóku samtals 165 klukkustundir og lauk náminu með prófi. Árið 1995 luku 25 manns hér á landi námi í höfuðbeina- og spjaldhryggsjöfnun og 35 manns árið 1998. Meðal þeirra sem sótt hafa námskeið í greininni hér á landi og eru í félaginu eru hjúkrunarfræðingar, sálfræðingar, sjúkranuddarar, kennarar, nuddarar, sjúkraliðar og heilarar.

Fara efst á síðu...

Hvernig er háttað námi í höfuðbeina- og spjaldhryggsjöfnun?

CCST skólinn í London (College of Cranio-Sacral Therapy) leggur mikla áherslu á gæði og umfang kennslunnar til þess að veita verðandi höfuðbeina- og spjaldhryggsjöfnurum sem yfirgripsmesta þekkingu og gera þá sem hæfasta til þess að veita árangursríka meðferð gegn margs konar kvillum og sjúkdómum.

Tengsl íslenskra höfuðbeina- og spjaldhryggsjafnara við CCST-skólann í London má rekja til þess að árið 1997 fóru Guðrún Hauksdóttir og Gunnar Gunnarsson til London í frekara nám í þeim skóla varðandi vinnu með börn. Það varð til þess að í október 1998 kom Thomas Attlee, skólastjóri og stofnandi skólans,  til Íslands og hóf kennslu á vegum CCST hér á landi. Hann hefur komið reglulega til landsins og haldið námskeið.

Námið er yfirgripsmikið og þeir nemendur sem ljúka námi eru færir um að veita árangursríka meðferð við margs konar kvillum. Námið er í sex hlutum og tekur samtals tvö ár þar sem skiptast á krefjandi námskeið og reglulegar æfingar og heimaverkefni. Hvert námskeið stendur í sex daga, samtals 45-50 klukkustundir og er í formi fyrirlestra, sýnikennslu og æfinga. Til viðbótar eru gerðar kröfur um að nemandi sæki sér tiltekna menntun í líffræði, lífeðlisfræði og sjúkdómafræði.

Markmið CCST skólans er að nemendur sem útskrifast sem höfuðbeina- og spjaldhryggsjafnarar hafi áður farið í gegnum ítarleg og umfangsmikil námskeið, hafi til þess vandað kennsluefni til lestrar og fari í gegnum strangt æfingaferli á þeim tveimur árum sem það tekur að ljúka náminu - þar sem skiptast á sex yfirgripsmikil námskeið sem standa í eina viku í senn og hins vegar reglulegar æfingar þar sem unnið er með skjólstæðinga með hliðsjón af námsefni þeirra námskeiða sem viðkomandi nemandi hefur lokið. Það er hinn virti Thomas Attlee, stofnandi og skólastjóri CCST skólans, sem kennt hefur á námskeiðum í höfuðbeina- og spjaldhryggsjöfnun hér á landi með aðstoð þeirra sem lengst hafa starfað og mest hafa lært hér á landi, en það fólk hefur síðan einnig haldið utan um æfingakvöld nemenda á milli námskeiðanna. Námið sem CCST-skólinn í London hefur boðið upp á hér á landi stenst fyllilega kröfur sem gerðar eru af Bandalagi íslenskra græðara sem skilyrði fyrir aðild að bandalaginu.

Fara efst á síðu...

Verð og greiðslur

Einn meðferðartími kostar 4.000 krónur. Þjónustan er því miður ekki niðurgreidd af Tryggingastofnun ríkisins en athygli er vakin á að mörg stéttarfélög endurgreiða hluta kostnaðar - ef fyrir liggur tilvísun eða vottorð frá lækni um þörfina fyrir meðferð af þessu tagi (sambærilegt við sjúkranudd og fleira slíkt). Leitaðu upplýsinga hjá stéttarfélaginu þínu.

Tíðni og fjöldi tíma

Að jafnaði er miðað við að fólk fái ekki meðferð oftar en einu sinni í viku á meðferðartímanum. Gera má ráð fyrir að þrír tímar með reglulegu millibili nægi í flestum tilvikum en það er nokkuð einstaklingsbundið og fer einnig eftir því hvaða kvilla eða sjúkdóm við er að eiga.

Líkaminn læknar sig sjálfur

Hippocrates sagði að líkaminn læknaði sig sjálfur og sá sem veitir meðferð sé aðeins verkfæri náttúrunnar til þess. Allt sem ég geri með aðstoð Bowen tækni eða með höfuðbeina- og spjaldhryggsjöfnun miðar að því að hjálpa líkamanum til þess að lækna sig sjálfur.

Ég hjálpa þér með því að meðhöndla líkamann með þeirri aðferð sem hentar þér - með tilliti til líkamlegs og andlegs ástands þíns. Meðferðin sem ég veiti er þægileg og afslappandi. Þú getur náð djúpri slökun um leið og líkami þinn fær þá hjálp sem hann þarfnast til endurnæringar og þá aðstoð og hvatningu sem hann þarf til að lækna sig sjálfur.

TFT-meðferð, Bowen tækni og höfuðbeina- og spjald-hryggsjöfnun eru aðferðir sem hafa reynst mjög árangursríkar. Hverja þessara aðferða ég nota hverju sinni fer eftir því við hvaða vandamál er að fást, ástandi og óskum skjólstæðings míns  ásamt mati mínu á aðstæðum og því hver þessara aðferða er líklegust til árangurs.

Fara efst á síðu...

Jóhanna Harðardóttir - Bowen tæknir & höfuðbeina- og spjaldhryggsjafnari. Upplýsingar og tímapantanir í síma 824 2777 og í netfanginu heilsubot@heilsubot.com.