Jóhanna Harðardóttir

Upplýsingar og tímapantanir í síma 824 2777
TFT-meðferð (Thought Field Therapy), Bowen tækni
og höfuðbeina- og spjaldhryggsjöfnun á Akureyri

Bowen-tækni

Hér að neðan eru svör við algengum spurningum um Bowen tækni.

Hvað er Bowen tækni?
Gegn hverju getur Bowen tækni gagnast?
Hvernig virkar meðferðin?
Í hverju felst meðferðin?
Hvert er upphaf og saga Bowen tækninnar?
Hver var Thomas Ambrose Bowen?
Hvernig er háttað námi í notkun Bowen tækninnar?
Listi yfir Bowen tækna á Íslandi

Ef þig vantar meiri upplýsingar skaltu ekki hika við að hafa samband við mig í síma eða með tölvupósti.

Hvað er Bowen tækni?

Bowen tækni er tegund meðferðar sem notuð er á líkamann og kemur af stað heilunarferli, er verkjastillandi og -losandi og endurnýjar orku líkamans. Eitt af einkennum Bowen tækni er að áhrifin eru þægileg, djúp og afslappandi.

Meðferð með Bowen tækni virðist mjög einföld. Þegar fylgst er með notkun hennar á líkamann og horft á hendur Bowen tæknisins lítur út fyrir að harla lítið sé gert. Áhrifin eru engu að síður mikil. Einmitt það hve létt meðferðin er, bæði fyrir Bowen tækninn og skjólstæðinginn, en jafnframt áhrifarík, hefur gert Bowen tæknina mjög vinsæla. Osteopatar, hnykkjarar og sjúkraþjálfarar eru meðal þeirra mörgu starfsstétta sem nota Bowen tækni, enda er hún eins og ferskur og slakandi vindur fyrir marga þá sem vanir eru að veita meðferð þar sem mikil líkamleg vinna er nauðsynleg.

Bowen tæknir notar þumla og fingur á ákveðna staði á líkamanum og gerir rúllandi hreyfingar með það að markmiði að trufla boðskipti milli heila vöðva og bandvefs og hafa þannig áhrif á orkuflæði innan líkamans.

Þeir sem notað hafa Bowen tækni hafa furðað sig á áhrifamætti þessarar mjúku og einföldu meðferðar. Russel Dick hefur starfað sem Osteopati í yfir 20 ár og er deildarforseti í Northern Countries School of Osteopaty. Hann segir Bowen tæknina hafa gjörbylt starfseminni á stofunni hans því átta af hverjum tíu sjúklinga hans vilja fá meðferð með Bowen tækni í stað hinnar hefðbundnu Osteopatíu.

Þeir sem aflað hafa sér mestrar reynslu og hafa mest að gera við notkun Bowen tækni segja það reynslu sína að flestir skjólstæðingar þurfi aðeins að mæta tvisvar til fjórum sinnum í meðferð. Tvær til þrjár meðferðir með viku millibili eru oftast nóg til að ná fram varanlegum bata við langvarandi verkjum en þó eru stundum fleiri meðferðir nauðsynlegar.

Til að ná fram hámarksárangri er mælt með að ekki séu aðrar meðferðir teknar samhliða Bowen, svo sem nudd, svæðanudd, sjúkraþjálfun og þess háttar. Ráðfærðu þig við Bowen tækninn þinn.

Fara efst á síðu...

Gegn hverju getur Bowen tækni gagnast?

Bowen tækni hentar fólki á öllum aldri. Hún er engum hættuleg og ekkert kemur í veg fyrir að hægt sé að beita henni. Hana má nota í neyðartilvikum og við hvaða aðstæður og við hvaða ástandi sem er. Það góða við Bowen tæknina er hve almennt hún virkar og að henni er hægt að beita á hvern sem er og við hvaða aðstæður sem er. Meðferðin hefur víðtæk áhrif, hvort sem er á vandamál tengd líkamsbyggingunni sjálfri, vöðvatengd vandamál eða margs konar líffæratengd vandamál.

Margir spyrja sem svo: Hvað getur þessi meðferð læknað? Hvaða sjúkdóma eða kvilla er mögulegt að fást við með aðstoð Bowen tækninnar? Svarið kann að koma á óvart – einkum þeim sem hættir til að gagnrýna þessa meðferð. Mikilvægt er að hafa í huga – og það er í raun eitt af grundvallaratriðunum í starfsemi Bowen tækna – að Bowen tæknin sjálf eða Bowen tæknirinn tekur ekki tiltekinn afmarkaðan eða skilgreindan sjúkdóm eða einkenni til meðferðar eða úrlausnar.

Reynslan hefur aftur á móti sýnt að meðferð með Bowen tækni er hægt að nota af öryggi og án áhættu gegn flestum þekktum vandamálum sem steðja að líkamanum. Nefna má bak- og hálsverki, vandamál í hnjám, íþróttameiðsl, RSI, axlamein, tennisolnboga og öndunarvandamál. Þá hefur meðferðin virkað vel gegn síþreytu, heymæði, höfuðverk, nýrnavandamálum og vandamálum sem tengjast sogæðakerfinu. Þetta er hins vegar ekki tæmandi listi sem skilgreinir hvað Bowen tæknin getur lagfært, aðeins dæmi um vandamál sem reynslan hefur sýnt að eru móttækileg fyrir því sem líkaminn gerir í framhaldi af meðferð með Bowen tækni.

Einn af kostum Bowen tækninnar er það sem kalla mætti óvæntur hliðarárangur. Meðferðin sjálf er almenn og er ekki beint sérstaklega gegn ákveðnum sjúkdómi. Einmitt vegna þessa hefur fólk fengið bata á öðrum sviðum en þeim sem voru upphaflega ástæða fyrir því að það ákvað að fara í meðferð. Til dæmis gæti skjólstæðingur komið í meðferð vegna verkja en fengið óvænta bót á heymæði vegna áhrifamáttar meðferðarinnar. Þetta undirstrikar að það er ekki Bowen tæknirinn sem er að vinna verkið heldur líkaminn sjálfur. Örvunin sem hann fær með snertingunni í meðferðartímanum verður til þess að fleira lagast en það sem skjólstæðingurinn helst bjóst við eða vildi losna við eða laga.

Margir fara til Bowen tæknis tvisvar til fjórum sinnum á ári til þess að losa sig við streitu og viðhalda góðri heilsu.

Fara efst á síðu...

Hvernig virkar meðferðin?

Meðferðin samanstendur af röð mjúkra hreyfinga sem gerðar eru með þumlum og fingrum yfir vöðva, sinar, liðbönd og húð. Notaður er mjög léttur þrýstingur, svo léttur að nota mætti orðið augasteinsþrýstingur – það er þrýstingur sem hægt er að nota á auga án þess að orsaka sársauka eða skemmd á auga.

Bowen tæknirinn notar slaka húðarinnar til þess að ná til bandvefsins, þrýstir og gerir rúllandi hreyfingu yfir svæðið. Jafnvel þótt hreyfingin sé ekki hörð á vöðvann þá kveikir hún á eins konar viðvörunarbjöllu í heilanum sem kemur af stað náttúrulegum viðbrögðum líkamans til þess að laga það sem þarf. Vegna þess hve lítið við vitum um það hvernig heilinn vinnur hafa skapast miklar vangaveltur um áhrifamátt Bowen tækninnar og hvernig hún virkar í raun. Þær vangaveltur halda auðvitað áfram en aftur á móti hafa sumir ekki áhyggjur af því hvernig meðferðin virkar – svo framarlega sem hún virkar.

Markmiðið með Bowen hreyfingunum er að trufla boðskipti milli viðkomandi hluta líkamans og heilans, koma á þau eins konar lykkju þannig að þau fari aftur til baka til líkamshlutans sem um ræðir. Þetta er mjög náttúrulegt ferli til þess að trufla þau 600 þúsund boð sem heilinn sendir á hverri sekúndu.

Þegar heilinn leitast við að túlka boðin sem voru trufluð sendir hann boð til taugaenda og á þau svæði sem Bowen tæknirinn hefur verið að vinna með. Með því er heilinn að spyrja: Hvað er að gerast? Þegar ekki fæst skynsamlegt svar reynir hann að finna fyrir höndunum á líkamanum. Algengt er að fólki finnist sem hendur Bowen tæknisins snerti líkamann eftir að snertingu hefur verið hætt. Einnig er algengt að fram komi kitlandi tilfinning eða hiti. Þetta er til marks um að líkaminn sé að vakna en sýnir einnig aðra mikilvæga þætti í Bowen tækninni.

Eitt af lykilatriðum meðferðar með Bowen tækni er að Bowen tæknirinn fer út úr herberginu á milli ákveðinna hreyfinga, ákveðinna aðgerða, til þess að meðferðin verði áhrifaríkari. Þótt meðferðin sé mjúk og þægileg verða heili og líkami skjólstæðingsins að fá tíma og tækifæri til þess að skoða hvað er að gerast og hvað gera þurfi til þess að ná fram breytingu. Brotthvarf Bowen tæknisins gefur það svigrúm sem þarf. Brotthvarf tæknisins er fjarri því að vera hlutlaus gjörð. Með því er heilunarferlinu leyft að hefjast. Sá eða sú sem ekki gefur þessi hlé er ekki að nota Bowen tæknina en þó er slíkum hléum sleppt í algjörum undantekningartilfellum.

Lykillinn að árangri með Bowen tækni er hve lítið þarf að gera til þess að fá líkamann í gang þannig að hann fari að laga og lækna sig sjálfur.

Spyrja má hvernig – eða ef til vill öllu heldur hvers vegna – virkar Bowen tæknin? Um það hafa verið uppi mismunandi kenningar en því miður vantar meiri rannsóknir til að byggja á sem beinlínis beinast að því hvernig Bowen tæknin virkar  svo hægt sé að fullyrða eða segja til um það með nokkurri vissu.

Aftur á móti hafa reynst gagnlegar rannsóknir Dr. Vilayanur S. Ramachandran, prófessors í taugafræði og sálfræði við Háskólann í San Diego í Kaliforniíu. Rannsóknir hans snerust reyndar ekkert um Bowen tæknina heldur um draugaverki, svokallaða - verki í útlimum sem ekki eru lengur til staðar. Þær rannsóknir hafa aukið skilning manna á því hvernig heilinn túlkar upplýsingar sem líkaminn fær. Heilinn sendir frá sér rafboð í yfirgengilegu magni – einhverjar milljónir boða á sekúndu og fær upplýsingar til baka. Þetta er mikið verk – heilinn er samtímis að vinna með hitaaðlögun, meltingarensím, hjartslátt, vökvamagn, hormónamagn, ónæmiskerfið – svo nefnd séu örfá dæmi um þau verkefni sem segja má að séu stöðugt á dagskránni. Þetta gerist án þess að við séum raunverulega meðvituð um það og snýst allt saman um að taka við upplýsingum, túlka þær og senda frá sér boð. Heilinn þarf ekki að bregðast við öllum þeim upplýsingum sem honum berast. Segja má að þetta sé hliðstætt því sem við upplifum í daglega lífinu – daglega fáum við mikið magn af upplýsingum sem okkur eru ónauðsynlegar og segja má að oft sé það fyrri reynsla sem segir okkur við hverju við þurfum að bregðast og hverju ekki. Við fáum ef til vill auglýsingabækling í póstinum og vitum af fyrri reynslu að okkur er engin þörf á að opna hann – hendum honum óopnuðum. Á svipaðan hátt byggir heilinn á fyrri reynslu þegar hann bregst við – eða bregst ekki við – upplýsingum sem hann fær. Ef við leggjum hönd á heita eldavélarhellu berst viðvörun eldsnöggt til heilans og hann skipar fyrir um aðgerðir til mótvægis – og við kippum hendinni að okkur. Barn sem aldrei hefur brennt sig er líklegt til að brenna sig af því að það hefur ekki reynsluna sem til þarf.

Ein af tilraunum Ramachandrans gekk út á að losa mann – sem hafði misst handlegginn ofan við olnboga – við verk sem hann fann fyrir í horfnu höndinni. Honum fannst eins og hann væri stöðugt með krepptan hnefa og gæti ekki losað hann. Heilinn sendi höndinni skipunina “krepptu” en höndin var augljóslega ófær um að hlýða boðunum og ófær um að senda boð til baka um að aðgerð hafi tekist eða mistekist. Óþægindin voru umtalsverð fyrir manninn.

Lausn Ramachandrans á þessu vandamáli var einföld og sýndi hve auðvelt er að sannfæra heilann um eitthvað jafnvel þó svo þær upplýsingar sem notaðar eru séu rangar. Ramachandran bjó til kassa með tveimur hólfum. Maðurinn stakk höndunum ofan í kassann, hægri handleggnum í hægra hólfið og vinstri í vinstra hólfið. Á milli hólfanna var spegill þannig að þegar hann horfði ofan í kassann fékk heilinn þau skilaboð að hann báðir handleggir hans væru heilir – og viti menn, hann gat losað um hnefann á höndinni sem hann hafði misst. Þetta sýnir okkur að heilinn er mjög háður þeim skilaboðum sem hann fær frá líkamanum og hefur tilhneigingu til að taka fyrstu upplýsingar sem hann fær góðar og gildar jafnvel þó þær séu rangar eða ónákvæmar.

Þegar Bowen tæknin er notuð og líkaminn finnur snertingu á tilteknum stað spyr hann ákveðinna spurninga í þeim tilgangi að vita hvernig hann á að bregðast við. Hann byrjar á upplýsingum sem hann þekkir, til dæmis hvort snertingin hafi verið heit, sársaukafull á einhvern hátt og svo framvegis. Hann heldur áfram að leita að viðmiðum til þess að nota í viðbrögðum sínum við þessari snertingu.

Bowen snertingin er honum hins vegar svo óvenjuleg eða framandi að heilinn á erfitt með að finna þessi viðmið og fer því út í ítarlegri rannsóknir á því hvað er að gerast. Á þessum tímapunkti hefst hið raunverulega starf Bowen tæknisins – og hann yfirgefur herbergið þar sem skjólstæðingur hans er. Að Bowen tækninum fjarstöddum byrjar heilinn strax að reyna að átta sig á því hvað gerðist þegar þessi snerting var framkvæmd. Þessi snerting er hins vegar ekki eitthvað kunnuglegt eins og heitt, kalt, sársauki eða þrýstingur til dæmis þannig að alfa heilabylgjurnar taka við og líkaminn slakar á. Þegar Bowen tæknir kemur aftur inn í herbergið er algengt að skjólstæðingur segi að sér hafi fundist eins og hendur hans hafi haldið snertingunni allan tímann eða að hann hafi fundið einhvers konar hitaleiðing á því svæði sem snert var. Þetta bendir til þess að heilinn hafi leitað eftir frekari upplýsingum frá líkamanum til þess að geta ákveðið viðbrögð við snertingunni.

Í mörgum greinum snertimeðferðar má hugsa sér að sá eða sú sem meðferðina veitir vilji fyrir alla muni að skjólstæðingnum líði betur strax við lok meðferðartímans – finni mun áður en hann yfirgefur stofuna. Því meiri eða ákafari sem snertingin sjálf er, því sterkari er þessi vilji að skjólstæðingurinn finni strax fyrir batanum. Bowen tæknin nálgast viðfangsefnið hins vegar frá öðru sjónarhorni. Algengt er að skjólstæðingurinn fari heim nokkurn veginn í sama ástandi og hann kom. Ástæðan er sú að Bowen meðferðin sem slík hefst með snertingu en hún heldur áfram fyrir tilstilli hæfileika líkamans til sjálfsheilunar. Snertingin kemur ferlinu af stað en sjálf meðferðin er stöðugt í gangi. Fyrstu dagana er ekki óalgengt að fólk finni jafnvel fyrir slappleika, stirðleika eða öðru sem fylgir því að líkaminn ræðst gegn vandanum.

Fara efst á síðu...

Í hverju felst meðferðin?

Bowen tæknir notar þumla og fingur á ákveðna staði á líkamanum og gerir rúllandi hreyfingar með það að markmiði að trufla boðskipti til vöðva og bandvefs og að trufla orkuflæði innan líkamans. Mögulegt er að vinna að mestu í gegnum þunn föt. Meðferðin sjálf tekur um það bil 35-45 mínútur.

Með reglulegu millibili er gert hlé á meðferðinni þannig að líkaminn nái að melta þessar mjúku hreyfingar. Þetta gefur líkamanum tækifæri til þess að gera þær breytingar sem hjálpa til við að losa um spennu, draga úr verkjum og hefja heilunarferlið. Bowen tæknin hvetur líkamann til eigin endurnýjunar og lagfæringar. Engri þvingun né heldur afli er beitt við meðferðina. Bowen tækni er ekki nuddaðferð.

Líkamleg áreynsla er engin, hvergi er togað, teygt, snúið eða með nokkrum hætti beitt líkamlegri þvingun eða meðferðinni þröngvað upp á líkamann.

Eina þvingunin – ef nota má það orð – felst í því að fá heilann til að bregðast við þessum litlu truflunum á boðskiptum sem verða þegar þrýst er létt á tiltekna staði líkamans. Þetta er einn af grundvallarþáttunum í Bowen tækninni – þrýstingur, truflun á boðskiptum, heilinn fer að athuga hvað er í gangi, leitar að lausn og þar með er hrundið af stað ferli sjálfsheilunar innan líkamans. Bowen tæknirinn læknar engan. Líkaminn læknar sig sjálfur eftir að inngrip Bowen tæknisins vekur athygli hans á vandamálinu.

Spyrja má hve margar meðferðir fólk þarf og auðvitað er svarið við því einfalt: það er mismunandi eftir því hver á í hlut og hvert vandamálið er. Tom Bowen sjálfur tók fólk yfirleitt einu sinni til tvisvar í meðferð. Margir Bowen tæknar í dag myndu svara því til að skjólstæðingar þeirra komi að meðaltali þrisvar til fjórum sinnum í meðferð. Þó er mikilvægt að hafa í huga að í einhverjum tilvikum er þörf á að fólk komi oftar – til dæmis þegar við langvarandi vandamál að etja, svo sem afleiðingar heilablóðfalls eða liðagigt, svo dæmi sé tekið. Almennt er miðað við að ekki sé minna en vika milli meðferðartíma og að ekki sé tekin annars konar hliðarmeðferð á sama tíma. Þetta þýðir þó auðvitað ekki að Bowen tæknir segi skjólstæðingi sínum að hætta á lyfjum á meðan á Bowen meðferðinni stendur. Hér er átt við að ekki sé mælt með til dæmis sjúkranuddi, sjúkraþjálfun, höfuðbeina- og spjaldhryggsjöfnun, hnykklækningum eða annars konar snertimeðferð á sama tímabili og Bowen meðferðin stendur yfir.

Fara efst á síðu...

Hvert er upphaf og saga Bowen tækninnar?

Bowen tækni er aðferð sem Thomas Ambrose Bowen fann upp. Hann fæddist í Ástralíu 1916 og bjó lengst af í Geelong í Viktoríuríki. Hann hætti í skóla 14-15 ára gamall og fór að vinna svo fjölskyldan hefði nóg að bíta og brenna. Eftir að hafa unnið ýmis verkamannastörf sem ungur maður fékk hann mikinn áhuga á nuddi og virkni líkamans. Hann eyddi miklum tíma í að fylgjast með knattspyrnuþjálfurum og öðrum sem störfuðu við íþróttir.

Í starfi sínu í steypuskála einingaverksmiðju tók Tom eftir því að vinnufélagarnir áttu við ýmiss konar álagsmeiðsli að stríða. Hann fór að prófa sig áfram við að hjálpa þeim. Árangurinn varð sá að samverkamönnum hans leið mun betur. Hæfileikar Toms spurðust fljótt út og í kringum 1950 var hann farinn að taka á móti fólki á heimili sínu eftir fullan vinnudag í steypuskálanum og veita því meðferð. Þegar hann kom heim úr vinnu sinni beið venjulega stór hópur fólks fyrir utan heimili hans eftir því að fá hjálp gegn kvillum sínum.

Í nokkur ár hjálpaði hann fólki eftir venjulegan vinnudag og var þá að langt fram á kvöld. Að lokum hafði skjólstæðingum hans fjölgað svo mikið að hann varð að velja á milli vinnu sinnar í verksmiðjunni og að hjálpa fólki. Valið var auðvelt!

Tom opnaði stofu og gerði það að fullu starfi að hjálpa fólki. Annan hvern laugardag vann hann með fötluðum börnum endurgjaldslaust til þess að bæta líðan þeirra og líf. Sem forfallinn íþróttaáhugamaður hafði hann alltaf opið fyrir íþróttamenn bæjarins á leikdögum til þess að hjálpa þeim þegar þeir meiddust.

Um 1960 var sú meðferð sem Tom Bowen veitti orðin sú vinsælasta í Ástralíu. Hann meðhöndlaði yfir 13 þúsund skjólstæðinga á ári með aðferð sinni.

Bowen tæknin barst til Englands árið 1993 og er nú að verða vinsælasta grein óhefðbundinna lækninga þar í landi. Í dag er þessi aðferð notuð á hinum ýmsu stofnunum og endurhæfingardeildum sjúkrahúsa í Bretlandi og víðar um heim. Íþróttafélög hafa ráðið til sín Bowen tækna til þess að flýta fyrir bata hjá meiddum leikmönnum og til að nota sem fyrirbyggjandi meðferð gegn meiðslum, með mjög góðum árangri. Sjúkraþjálfarar, læknar og fleiri hafa tekið upp aðferðir Bowens til þess að ná sem bestum árangri í meðferð skjólstæðinga sinna.

Fara efst á síðu...

Hvernig er háttað námi í notkun Bowen tækninnar?

Námskeið ECBS (European College of Bowen Studies í London) í Bowen tækni eru þau virtustu í heiminum í dag. ECBS er eini einkaskólinn sem er viðurkenndur af Federation of Holistic Therapist, stærstu samtökum meðferðarfólks í Bretlandi. ECBS er aðili að BCMA, British Complementary Medicine Association, og er uppbygging hans viðurkennd af BTER, Bowen Therapists' European Register, einu sjálfstæðu Bowentækni samtökunum í Evrópu.

Uppbyggingin á kennslu í Bowen tækni hjá ECBS hefur sannað sig í því að skila nemendum í hæsta gæðaflokki og er í dag notað af mörgum öðrum skólum. Þetta gerir kennsluna hjá ECBS þá viðamestu í Bowen tækni sem boðið er upp á.

Kennslan felst í því að dreifa náminu með það markmiði að nemendur öðlist sjálfstraust í því sem þeir gera áður en næsta skref er tekið. Hæfni í verklega þættinum í Bowen tækni er því á hæsta stigi.

ECBS kennarar ganga í gegnum margra mánaða kennslu og þjálfun, vinna í fleiri hundruð tíma undir leiðsögn og símati. Þetta eru einu kennararnir í Bowen tækni sem ganga í gegnum svo mikla þjálfun. Auk þessa er símenntun hjá kennurum ECBS ásamt því að þeir fara í frí saman til að samstilla hópinn og styðja hver annan með það að markmiði að gera hópinn samstíga í kennslunni. Þetta gerir það að verkum að þeir eru hæfir til að veita einstaklega góða þjálfun,  kennslu og stuðning til nemenda.

Stuðningur við nemandann er höfuðatriði hjá ECBS því margvíslegar spurningar geta komið upp á milli námskeiða. Þess vegna eru allir kennarar skólans, hvar í heiminum sem þeir eru, alltaf reiðubúnir að svara spurningum og aðstoða við hvers kyns vandamál sem koma upp, hvort sem er í gegnum síma, faxtæki eða tölvupóst.

Námsefnið er unnið með það í huga að það geti verið gott uppflettirit þar sem notkunin er ekki eingöngu á meðan á námi stendur. Einnig fá nemendur myndabók þar sem sýndar eru flestar þær hreyfingar sem kenndar eru.

Í byrjun var eingöngu kennt á Bretlandseyjum en frá 1999 hefur skólinn meðal annars verið að kenna í Hollandi, Svíþjóð, Spáni, Suður-Afríku og Íslandi.

Fara efst á síðu...

Verð og greiðslur

Einn meðferðartími kostar 4.000 krónur. Þjónustan er því miður ekki niðurgreidd af Tryggingastofnun ríkisins en athygli er vakin á að mörg stéttarfélög endurgreiða hluta kostnaðar - ef fyrir liggur tilvísun eða vottorð frá lækni um þörfina fyrir meðferð af þessu tagi (sambærilegt við sjúkranudd og fleira slíkt). Leitaðu upplýsinga hjá stéttarfélaginu þínu.

Tíðni og fjöldi tíma

Að jafnaði er miðað við að fólk fái ekki meðferð oftar en einu sinni í viku á meðferðartímanum. Gera má ráð fyrir að þrír tímar með reglulegu millibili nægi í flestum tilvikum en það er nokkuð einstaklingsbundið og fer einnig eftir því hvaða kvilla eða sjúkdóm við er að eiga.

Líkaminn læknar sig sjálfur

Hippocrates sagði að líkaminn læknaði sig sjálfur og sá sem veitir meðferð sé aðeins verkfæri náttúrunnar til þess. Allt sem ég geri með aðstoð Bowen tækni eða með höfuðbeina- og spjaldhryggsjöfnun miðar að því að hjálpa líkamanum til þess að lækna sig sjálfur.

Ég hjálpa þér með því að meðhöndla líkamann með þeirri aðferð sem hentar þér - með tilliti til líkamlegs og andlegs ástands þíns. Meðferðin sem ég veiti er þægileg og afslappandi. Þú getur náð djúpri slökun um leið og líkami þinn fær þá hjálp sem hann þarfnast til endurnæringar og þá aðstoð og hvatningu sem hann þarf til að lækna sig sjálfur.

TFT-meðferð, Bowen tækni og höfuðbeina- og spjald-hryggsjöfnun eru aðferðir sem hafa reynst mjög árangursríkar. Hverja þessara aðferða ég nota hverju sinni fer eftir því við hvaða vandamál er að fást, ástandi og óskum skjólstæðings míns  ásamt mati mínu á aðstæðum og því hver þessara aðferða er líklegust til árangurs.

Fara efst á síðu...

Jóhanna Harðardóttir - Bowen tæknir & höfuðbeina- og spjaldhryggsjafnari. Upplýsingar og tímapantanir í síma 824 2777 og í netfanginu heilsubot@heilsubot.com.